धुलिखेल, १ जेठः काभ्रेको रोशी गाउँपालिकाका कोरोना संक्रमितका परिवारमा कोरोना भाइरस नभएको पुष्टि भएको छ । धुलिखेल अस्पतालको कोरोना प्रयोगशालामा गरिएको स्वाब परीक्षणमा कोरोना नदेखिएको पालिकाका स्वास्थ्य संयोजक गंगालाल श्रेष्ठले जानकारी दिए ।

रोशीका ३ जनामा कोरोना संक्रमण देखिएपछि उनीहरुको परिवारका सदस्यहरुको पनि कोरोना परीक्षण गरिएको थियो । कन्ट्रयाक ट्रेसिङका आधारमा तीन जना संक्रमित परिवारका ७ जनाको पीसीआर परीक्षण गरिएको थियो । संक्रमितको सम्पर्कमा आएका ४ जना स्वास्थ्यकर्मीको पनि रिपोट नेगेटिभ आएको छ ।

पालिकाले १ जना सुरक्षाकर्मीको समेत स्वाब संकलन गरी पठाएको थियो । उनको पनि नेगेटिभ आएको स्वास्थ्य संयोजक श्रेष्ठले बताए । ‘३ जनामा कोरोना पुष्टि भएपछि कन्ट्रयाक ट्रेसिङको आधारमा हामीले १२ जनाको स्वाब संकलन गरेर धुलिखेल अस्पताल पठाएका थियौँ, स्वास्थ्य संयोजक श्रेष्ठले भने ‘१२ जनामै कोरोना भाइरस नभएको पुष्टि भएको छ ।’

पालिकाले सञ्चालनमा ल्याएको मंगल जनविजय माविको क्वारेन्टाइनमा ६ जना बसिरहेका छन् । क्वारेन्टाइन बसेका मध्ये ५ जनाको आज स्वाब संकलन गरिएको छ । उनीहरु सबै भारतबाट आएका हुन् । अर्का एक जनाको भने स्वाब संकलन गर्ने समय नभइसकेकाले केहिदिन पछि धुलिखेल अस्पताल पठाइने छ । भारतबाट आउनेक्रम अझै रहेको स्वास्थ्य संयोजक श्रेष्ठले बताए । ‘भारतबाट आउनु अधिकांश मानिस हाम्रो सम्पर्कमा हुनुहुन्छ, अहिले विभिन्न ठाउँमा आइपुगेका छौँ भनेर फोन गरिरहनुभएको छ, श्रेष्ठले भने ‘हामीले पालिकाभित्रका सबैलाई भनेका छौँ, यदि कोहि भारतबाट बिना जानकारी घर आइपुग्नुभएको छ भने तत्काल हामीलाई खबर गर्नुस् ।’