धुलिखेल, २६ जेठ : धुलिखेल नगरपालिका मेयर अशोक ब्याञ्जु र उपमेयर बिमला शर्मा अमेरिकन फौजी किराले आक्रान्त बनेका किसानलाई भेट्न पुगेका छन् । उनीहरुले सोमबार वडा नम्बर ९ काभ्रेभञ्ज्याङ क्षेत्रका किसानहरुसँग भेटघाट गरेका हुन् ।

नगरपालिकाको कृषि शाखाले केहि दिनअघि वडा नम्बर ८ बडाल गाउँबाट अमेरिकन फौजी किरा नियन्त्रणका लागि निःशुल्क विषादी वितरण थालेको छ । मेयर श्रेष्ठ र उपमेयर शर्मा पनि किसानलाई भेट्न विषादी लिएर पुगेका हुन् । वडा नम्बर ९ का ३ सय किसानलाई विषादी वितरण गरेको मेयर ब्याञ्जुले जानकारी दिए । उनीहरुले किसानसँग छलफल समेत गरेका छन् ।

नगरपालिकाले यस अघि वडा नम्बर १, २, ६, ८ र ११ का किसानलाई पनि विषादी वितरण गरिसकेको छ । हाइब्रिड जातको मकैमा अमेरिकन फौजी किराले आक्रमण गरेपछि किसानहरु चिन्तित बनेका छन् । मेयर ब्याञ्जुले नगरपालिकाले किसानलाई किङ्स्टार नामको विषादी हस्तान्तण गरेका थिए । किसानले मेयरसँग आगामी आर्थिक वर्षमा किसानका लागि नयाँ नयाँ योजना ल्याउन आग्रह गरेका थिए । जवाफमा मेयर ब्याञ्जुले कृषि क्षेत्रको विकासका लागि बार्षिक १ करोड बजेट विनियोजन गरेको भन्दै कृषि मैत्री सहर बनाउने उद्देश्य सहित कृषि रणनीति बनाएर लागु गरिएकाले किसानको समस्या समाधान गर्न नगरपालिकाले लागि परेको बताए ।

नगरपालिकाको कृषि शाखाले हरेक किसानको तीन रोपनी क्षेत्रफल जमिनमा पुग्ने गरी निःशुल्क विषादी वितरण गरिरहेको शाखा प्रमुख मन्दिल कृष्ण श्रेष्ठले जानकारी दिए । ‘हामीले प्रत्येक किसानलाई तीन रोपनी क्षेत्रफल जमिनमा पुग्ने गरी निःशुल्क विषादी वितरण गरेका छौँ, शाखा प्रमुख श्रेष्ठले भने ‘यो बिषादीको नतिजा सकारात्मक देखिएको छ, किसानबाट गुनासो आएको छैन ।’