धुलिखेल, २४ जेठः काभ्रेमा शनिबार ९९ जना पुरुष र १४ जना महिला गरी १ सय १३ जना विभिन्न क्वारेन्टाइनमा बसिरहेका छन् । उनीहरु अधिकांश भारतबाट फर्किएका काभ्रेलीहरु हुन् ।

जिल्लामा क्वारेन्टाइन बेड संख्या ६ सय ६३ पुगेको छ । जिल्लाको सबैभन्दा बढी तेमाल गाउँपालिकामा १ सय ५ बेडको क्वारेटाइन तयार पारिएको छ । रोशी गाउँपालिकामा ८५ बेडको क्वारेन्टाइन तयार गरिएको छ । रोशीमा ११ जना क्वारेन्टाइनमा बसिरहेका छन् ।

त्यस्तै धुलिखेलमा ६५, पनौतीमा ६०, नमोबुद्धमा ५६, बनेपामा ५०, मण्डनदेउपुरमा २५ र पाँचखाल नगरपालिकामा ११ बेड क्षमताको क्वारेन्टाइन तयारी अवस्थामा राखिएको छ ।

त्यस्तै गरी महाभारत गाउँपालिकामा ३५, बेथानचोकमा ३५, चौरीदेउरालीमा ३०, भुम्लुमा ३० र खानी खोला गाउँपालिकामा २४ बेड क्षमताको क्वारेन्टाइन तयारी अवस्था रहेको जिल्ला कमाण्ड पोष्टले जनाएको छ ।

कोरोना आंशकामा शीर मेमोरियल अस्पतालको आइसोलेसनमा रहनुभएका एक जना महिला डिस्चार्ज हुनुभएको छ । जिल्ला स्वास्थ्य कार्यालय काभ्रेले दिएको जानकारी अनुसार शुक्रबार डिस्चार्ज गरिएका हो ।

जिल्लामा आइसोलेसन कक्षको संख्या भने अझसम्म बढाइएको छैन । धुलिखेल अस्पतालमा ८ र शीर मेमोरियल अस्पताल बनेपामा ५ गरी १३ वटा आइसोलेसन कक्ष रहेका छन् । कोभिड संकट ब्यवस्थापन केन्द्र काभ्रेले यस अघि आइसोलेसन कक्ष बढाउने निर्णय गरेपछि अहिलेसम्म कार्यान्वयनमा आउन सकेको छैन् ।