धुलिखेल, २३ जेठः काभ्रेमा पहिलो देखि कोरोना संक्रमण पुष्टि भएका सबैलाई उपचारका लागि भक्तपुर पठाइएको छ । स्वास्थ्य कार्यालय काभ्रेका प्रमूख एवं जिल्ला कमाण्ड पोष्टका सदस्य सचिव डाक्टर नरेन्द्र कुमार झाका अनुसार सबै संक्रमितलाई भक्तपुर पठाइएको हो ।

धुलिखेल अस्पतालको कोरोना प्रयोगशालामा गरिएको परीक्षणमा काभ्रेको पाँच जनामा कोरोना संक्रमण पुष्टि भएको थियो । संक्रमण पुष्टि हुनेमा रोशी गाउँपालिकाका २० बर्षीय महिला, २२ र २९ बर्षीय २ जना पुरुष छन् । त्यस्तै पाँचखाल नगरपालिकाका ३९ बर्षीय पुरुष र पनौती नगरपालिकाका पनि ३९ बर्षीय पुरुष रहेका छन् । क्वारेन्टाइनमा बसिरहेका उनीको पीसीआर विधिबाट स्वाब परीक्षण गर्दा कोरोना देखिएको हो । रोशीका तिन जना नै भारतबाट आएका हुन् ।

उनीहरुको भक्तपुर स्थित काठमाण्डौ मेडिकल कलेज दुवाकोटको कोभिड अस्पतालमा उपचार हुनेछ । यस्तै बनेपामा रहेको शीर मेमोरियल अस्पतालको आइसोलेसनमा कोरोना आंशमा एक जना महिलालाई राखिएको डाक्टर झाले बताए ।

काभ्रेमा आज ९९ जना पुरुष र १३ जना महिला गरी १ सय १२ जना विभिन्न क्वारेन्टाइनमा बसिरहेका छन् ।