धुलिखेल, २१ जेठः बाढीले बगाएको पाइप जडान सकिएपछि आजबाट धुलिखेलको मुख्य ट्याङकीमा पानी झार्न सुरु गरिएको छ । दिउँसो दुई बजेदेखि खानेपानी धुलिखेल स्थित मुख्य ट्याङकीमा पठाइएको धुलिखेल खानेपानी उपभोक्ता समितिका अध्यक्ष रामेश्व श्रेष्ठले बताए ।

जेठ १४ गते पनौती क्षेत्रमा भिषण बर्षापछि आएको बाढीले धुलिखेल आउने खानेपानीको पाइप बगाएपछि धुलिखेलमा खानेपानीको चरम समस्या भइरहेको छ । मुख्य ट्याङकीमा पानी आइपुगेपछि बाढीले बगाउनु भन्दा अघिको अवस्थामा पानी आउन भने अझै एक हप्ता लाग्ने अध्यक्ष श्रेष्ठले बताए ।

बाढीले पनौती स्थित बाँसडोल खोलामा धुलिखेल आउने खानेपानीको पाइप बगाएको थियो । पनौती नगरपालिकाको वडा नम्बर १२ कलाती भूमिडाँडाबाट ल्याएको पानीको पाइप बाढीले बगाएको थियो । एकसाता बितिसक्दा पनि पानी नआउन पछि धुलिखेल नगरपालिकाले ट्याक्टर मार्फत समस्या ग्रस्त विभिन्न वडामा खानेपानी वितरण गर्न थालेको छ ।