धुलिखेल, ७ जेठः काभ्रेको भुम्लु गाउँपालिकास्थित वडा ८ नम्बर वडाअन्तर्गत पर्ने सिलामे भिरमा बोलेरो जीप दुर्घटना हुदाँ दुई जना सुनकोशीमा बेपत्ता भएका छन् ।

बेपत्ता हुनेमा भुम्लु गाउँपालिका वडा नम्बर १ सापिङका २६ बर्षीय अशोक गिरी र २८ बर्षीय भोला महत रहेको जिल्ला प्रहरी कार्यालय काभ्रेले जनाएको छ । बुधबार दोलालघाटबाट भुम्लु गाउँपालिकाको १ नम्बर वडा सापिङ हिडेको बा १६ च ८८३८ नम्बरको बोलेरो गाडी उकालो जार्दै गर्दा ब्याक आएर दुर्घटना भएको हो ।

प्रहरीका अनुसार जीप सिमेन्ट र कुखराको दाना लिएर जाँदै थियो । जीप नै सुनकोशी नदीमा खसेको नभइ उकालोमा ब्रेक लगाउने क्रममा जीपको पछाडी बसेका यात्रु सुनकोशीमा पुगेको प्रहरीले जनाएको छ ।

दुर्घटनामा ३९ बर्षीय सानुमाया गिरी घाइते भएको र उहाँको शीर मेमोरियल अस्पताल बनेपामा उपचार भइरहेको छ । घटनास्थलमा नेपाल प्रहरी र सशस्त्र प्रहरी पुगेका छन् ।