धुलिखेल, २५ बैशाखः जिल्ला कमाण्ड पोष्ट काभ्रेले जिल्लासँग सिमाना जोडिएका सबै नाका शील गर्ने निर्णय गरेसँगै साँगा नाकामा थप कडाइ गरिएको छ । राजधानीबाट काभ्रे प्रवेश गर्ने मुख्य नाकामा सवारी साधनको चेकजाँचलाई कडाइ गरिएको हो ।

एम्बुलेन्स, पासलिएका टिपर, तरकारी, फलफूल र खाद्यान्न बोकेका सवारी साधनलाई मात्रै प्रवेश गर्न दिइएको इलाका प्रहरी कार्यालय बनेका प्रमुख योगेन्द्र तिमिल्सिनाले जानकारी दिए । जिल्ला कमाण्ड पोष्टले बिहिबारदेखि सिन्धुपाल्चोक, ललितपुर, भक्तपुर, सिन्धुली, रामेछाप र मकवानपुर जिल्लासँग सबै नाकाबाट आवतजावत बन्द गर्न सबै स्थानीय तहलाई आग्रह गरेको थियो । सोहि अनुसार नाकाहरुमा कडाइ गरिएको कमाण्ड पोष्टका सदस्य सचिव एवं जिल्ला स्वास्थ्य कार्यालय काभ्रेका प्रमुख डाक्टर नरेन्द्र कुमार झाले बताए ।

कमाण्ड पोष्टले सिन्धुपाल्चोकसँग सिमाना जोडिएको मण्डनदेउपुर नगरपालिका, भुम्लु र चौरीदेउराली गाउँकाको नाका बन्द गर्न भनेको थियो । त्यस्तै भक्तपुरसँग जोडिएको बनेपा नगरपालिका, ललितपुरसँग जोडिएकोे खानीखोला र बेथानचोक गाउँपालिकाको पनि नाकाबाट आवतजावत गर्न रोक लगाइएको छ ।

रामेछापसँग सिमाना जोडिएको तेमाल र रोशी गाउँपालिकाको नाका पनि बन्द हुनेछ । सिन्धुली र मकवानपुरसँग नाका जोडिएको महाभारत गाउँपालिकाबाट पनि आवतजावत गर्न नपाइने निर्णयमा उल्लेख छ । कमाण्ड पोष्टले जिल्लाको १३ वटै स्थानीय तहको वडा र वस्तीस्तरसम्म निगरानी समूह गठन गरेर लकडाउनको प्रभावकारी कार्यान्वयन गर्न अनुरोध गरेको छ ।