धुलिखेल, १७ बैशाखः काभ्रेको तेमाल गाउँपालिकाले सुरु गरेको घर दैलो स्वास्थ्य परिक्षण कार्यक्रम अन्तर्गत २ हजारभन्दा बढी स्वास्थ्य परिक्षण गरिएको छ । पालिकाले सोमबारदेखि सबै वडामा घरदैलो स्वास्थ्य जाँच गर्न सुरु गरेको हो । दुई हजार ४२ जनाको स्वास्थ्य परिक्षण गरिसकेको पालिका अध्यक्ष सलाम सिंह तामाङले जानकारी दिए ।

पालिकाको वडा नम्बर १ देखि ९ नम्बरसम्मका घर–घरमै पुगेर स्वास्थ्यकर्मीहरुले स्वास्थ्य जाँच गरिरहेको स्वास्थ्य संयोजक शिवहरि पाठकले बताए । तेमाल गाउँपालिकामा ५ हजार ८ सय घरधुरी रहेका छन् । हालसम्म गरिएको स्वास्थ्य परिक्षणमा ५ जनामा सामान्य ज्वरो र ८३ जनामा सामान्य रुघाखोकी देखिएको छ । ज्वरो र रुघाखोकीका बिरामीलाई स्वास्थ्यकर्मीहरुले औषधि समेत दिएका छन् ।

वडामा रहेको स्वास्थ्य चौकीबाट दुई जना स्वास्थ्यकर्मी परिचालन भएका छन् । गाउँपालिकामा ११ वटा स्वास्थ्य संस्था छ । जसमा ५७ जना कर्मचारी कार्यरत छन् । कुनै पनि घर नछुटाइ स्वास्थ्य परिक्षण गर्न सबै स्वास्थ्य कर्मीहरुलाई निर्देशन दिइएको र सोहि अनुसार काम भइरहेको पालिका अध्यक्ष तामाङले जानकारी दिए ।

कतिपय वडामा जनसंख्या धेरै र भौगोलिक अवस्था कारण स्वास्थ्य परिक्षण गराउन समय लाग्ने पालिका अध्यक्ष तामाङले बताए । उनका अनुसार वडा नम्बर ३ मा अन्य वडाको तुलनामा अलिक छिटो स्वास्थ्य परिक्षणको काम सकिनेछ । ‘तेमाल गाउँपालिकाका हरेक नागरिकको स्वास्थ्य अवस्था पत्ता लगाउन हामीले घर–घरमा स्वास्थ्य कर्मी परिचालन गरेका हौँ, पालिका अध्यक्ष तामाङले भने ‘यो कुनै रहरले होइन, नागरिकको स्वस्थ राख्नु पालिकाको दायित्व हो ।’