धुलिखेल, ३० चैतः जिल्ला स्वास्थ्य कार्यालय काभ्रेले विदेशबाट आएका नागरिकको कोरोना भाइरस परीक्षणका लागि र्यापिड किट सम्बन्धित स्थानीय तहलाई हस्तान्तण गरेको छ । आइतबार कार्यालयले किट र एन ९५ मास्क हस्तान्तण गरेको हो ।

ल्याब भएका सबै स्थानीय तहलाई किट दिइरसकेको र विदेशबाट आएकाको परीक्षण हुने जिल्ला स्वास्थ्य कार्यालय काभ्रेका प्रमुख डाक्टर नरेन्द्र कुमार झाले जानकारी दिए । सबैभन्दा बढी पनौती नगरपालिकामा किट पठाइएको छ । पनौती नगरपालिकाले आइतबार ५ जनाको परिक्षण गरिसकेको छ । ६१ जनाको परिक्षण गर्नका लागि किट प्राप्त भएको र अबको एक दुई दिनभित्रै परिक्षण सकाइने नगरपालिकाका स्वास्थ्य संयोजक पुरुषोत्तम तिमिल्सिनाले बताए । जिल्लामा विदेशबाट फर्किनेको संख्या जिल्लाको सबैभन्दा बढी पनौती नगरपालिकामा रहेका छन् ।

रोशी गाउँपाकिलाले पनि परिक्षण सुरु गरेको छ । विदेशबाट आएका १७ जनाकै घरमा पुगेर रगत संकलन गरी मंगलटारमा रहेको ल्याबमा परिक्षण सुरु गरिएको पालिकाले जनाएको छ । पाँचखाल नगरपालिकाले ४० थान किट पाएको छ । विदेशबाट आएका ३८ जनाको परिक्षण हुने मेयर महेश खरेलले जानकारी दिए ।

धुलिखेल नगरपालिकाले  धुलिखेल  प्राथमिक स्वास्थ्य केन्द्रमा ६ जनाको कोभिड १९ को परिक्षण परिक्षण सुरु गरेकाे छ । साेमबार पनि परिक्षण गरिने स्वास्थ्य शाखा संयाेजक सन्दिप केसीले बताए ।

महाभारत र खानीखोला गाउँपालिकाका लागि २० वटा किट पठाइएको छ । बागमती प्रदेश सरकारको सामाजिक विकास मन्त्रालयले काभ्रे जिल्लालाई ३ सय थान किट पठाएको थियो । जिल्ला स्वास्थ्य कार्यालयको तथ्याङ्क अनुसार फागुन ३० गतेदेखि यता जिल्लामा २७१ जना विभिन्न देशबाट फर्किएका नागरिक सम्पर्कमा आएका छन् ।