धुलिखेल, २४ चैतः सिन्धुपाल्चोकको खाडिचौर स्थित सिन्धु सदावहार अस्पतालमा आइतबार एक जना महिला विहानै आइपुगिन । डाक्टरहरुले उनको अवस्था बुझे । कोरोना भाइरससँग मिल्दोजुल्दो लक्षण पाए । लिसंखु पाखर गाउँपालिका वडा नम्बर ७ घर भएकी उनी ओमानबाट फागुन २० गते फर्किएकी थिइन् ।

डाक्टरले लगत्तै आइसोलेसन कक्षमा जान सुझाए । तर जाने कसरी ? जिल्लाका धेरै एम्बुलेन्स चालकलाई सम्पर्क गरियो । तर कोहि काममा ब्यस्त छु भने त । कोहिले आफु उक्त महिलालाई लैजान तयार नभएको बताए । यो कुरा जिल्ला समन्वय समितिका प्रमुख कृष्ण गोपाल तामाङले पनि थाहा पाइसकेका थिए । उनले पनि धेरै एम्बुलेन्स चालकहरुलाई सम्वय गरे । तर कोहि मानेनन् । दिनभर जसो एम्बुलेन्स खोज्नै बित्यो ।

कोहि पनि एम्बुलेन्स चालक नमानेपछि चौतारामा रहेका जिसस प्रमुख तामाङ आफै गाडिलिएर जिल्ला स्वास्थ्य कार्यालयका प्रमुख दुर्गादत्त चापागाई सहित चाडिचौर पुगे । सुरक्षाका उपाय अपनाए । विरामी महिलालाई लिएर चौतारा अस्पतालमा पुगे । अहिले उनलाई चौतारा अस्पताको ओइसोलेसनमा राखिएको छ ।

ओमानबाट फर्किएकी उक्त महिला चैत १७ गते पनि उनी ज्वरो आएपछि स्वास्थ्य चौकीमा पुगेको बताइएको छ । ‘अस्पताल, जिल्ला स्वास्थ्य कार्यालय प्रमुख र स्वयम म आफैले एम्बुलेन्स चालकलाई फोन गरे, कोहि पनि उहाँलाई अस्पतालसम्म पुर्याउन तयार हुनुभएन जिसस प्रमुख तामाङले भने ‘म आफै गाडी लिएर गए र अस्पताल ल्याएर भर्ना गरियो, यो एउटा मानवीय सहयोग हो ।’

बिरामी महिला लिन जिसस प्रमुख आफै गाडी चलाएर अस्पताल पुगेका थिए । ‘सुरक्षाको जुन मापदण्ड अपनाउनुपर्ने थियो, त्यहि मापदण्ड अपनाएर आइसोलेसन कक्षसम्म महिलालाई पुर्याएका छौँ, स्वास्थ्य कार्यालय प्रमुख चापागाईले भने ‘सुरक्षामा कुनै कमी छैन् ।’