धुलिखेल, २० मंसिर काभ्रेको पनौती नगरपालिका साक्षर नगरपालिका घोषणा भएको छ ।

शुक्रबार एक कार्यक्रमको आयोजना गरी नगरपालिकालाई साक्षर घोषणा गरिएको हो । साक्षर घोषणाले नगरपालिकालाई थप हौसला मिलेको नगरप्रमूख भिम प्रसाद न्यौपानेले बताए । उनले कतिपय बस्तीमा अझै पनि निरक्षर छन भने त्यस्ता बस्तीका लागि नगरपालिकाले विशेष ब्यवस्था गरेर भएपनि पूर्ण सारक्षता पालिका बनाउने काम अघि बढ्न सबैसँग आग्रह गरे । ‘साक्षरता दिगो विकासको एक अभिन्न अंग हो, उनले भने ‘पालिकाका सबै साक्षर भए मात्रै समृद्ध पनौती नगर बनाउन मद्दत पुग्छ ।’

पनौती नगरपालिकासँगै जिल्लाको ७ वटा स्थानीय तह साक्षर घोषणा भएका छन् । घोषणा कार्यक्रममा संघीय सासंद गंगा बहादुर दोङ, पूर्व सभासद रामहरी सुवेदी, जिल्ला समन्वय समितिका प्रमूख उद्धव केसी, नगरपालिकाका उपप्रमूख गीता बञ्जारा लागयत सहभागि थिए ।

जिल्लाको धुलिखेल, मण्डनदेउपुर र बनेपा नगरपालिका साक्षर नगरपालिका यसअघि नै साक्षर घोषणा भइसकेका छन । त्यसैगरी भूम्लु, खानीखोला र तेमाल गाउँपालिका पनि साक्षर पालिका घोषणा भएका छन् । जिल्लाको १३ स्थानीय तहमध्ये अब चौरीदेउराली, रोशी, महाभारत र बेथानचोक गाउँपालिका त्यस्तै पाँचखाल र नमोबुद्ध नगरपालिका साक्षर हुन बाँकी छन ।

आफ्नो पालिकाको १५ देखि ६० वर्ष उमेर समूहको जम्मा निराक्षर ब्यक्तिको ९५ प्रतिशत भन्दा बढी जनसंख्या साक्षर भएपछि मात्रै साक्षर घोषणा गर्न मिल्ने ब्यवस्था सरकारले गरेको छ । राजधानीबाट सबैभन्दा नजिकको जिल्ला भएरपनि काभ्रे अझै साक्षरता युक्त जिल्ला बन्न सकेको छैन । जिल्लामा १० प्रतिशत नागरिक निरक्षर भएको शिक्षा विकास तथा समन्वय इकाई प्रमूख गोकर्णध्वज कार्कीले बताए । उनका अनुसार पाँचखाल नगरपालिका साक्षर घोषणाको तयारीमा जुटेको छ ।