काठमाण्डौँ १९ माघ: सञ्चार तथा सुचना प्रविधि मन्त्री गोकुल बास्कोटाले निजी विद्यालयमा ताला लगाउने पक्षमा सरकार नरहेको स्पष्ट पारेका छन् ।

शनिबार काभ्रेको धुलिखेलमा निजी तथा आवासीय विद्यालय अर्गनाइजेसन (प्याब्सन) काभ्रेको १३ औँ अधिवेशन उद्घाटन गर्दै मन्त्री बास्कोटाले वेतिथी हटाउन भने जरुरी रहेको बताए । ‘उच्चस्तरीय राष्ट्रिय शिक्षा आयोगको प्रतिवेदनका आधारमा सरकारले आज नै निजी विद्यालयहरुमा ताला लगाएर बन्द गराउन खोज्यो भन्ने भ्रममा नपर्नु होला, उनले भने ‘तर निजी विद्यालयभित्र बेथिती छ, त्यसलाई रोक्नुपर्छ, विज्ञाप्ति बाजी गरेर मात्रै समस्याको समाधान हुदैन्, बार्ता र सम्बाद गरेर अघि बढ्नुपर्छ ।’

मन्त्री बास्कोटाले शिक्षालाई ब्यापार नबनाउन समेत आग्रह गरे । ‘सरकार सबै क्षेत्रको विसंगति हटाएर नमूना नेपाल बनाउन चाहान्छ, उनले भने ‘त्यसमा तपाईहरुको पनि सहभागिता उत्तिकै आवश्यकता छ ।’ उनले फररर अग्रेंजी बोल्न जान्दैमा विद्यार्थीको शैक्षिक मापन गर्न नमिल्ने उल्लेख गरे । ‘निजीकरणका नाममा ब्यापारिकरण गर्न मिल्दैन, बास्कोटाले थपे ‘ज्ञानको मन्दिरलाई ज्ञान दिने थलोको रुपमा विकास गरौँ ।’

डाक्टर केसीले अनसन तोडेको भोली पल्ट धुलिखेल आएका मन्त्री बास्कोटाले राष्ट्रिय चिकित्सा शिक्षा विधेयक समेत दुबै सदनले पारित गरिसकेको भन्दै अनसन बस्ने, बनाउन प्रेरित गर्ने र विधेयक पास गराउने सबैलाई धन्यवाद दिए । सरकारका प्रवक्ता समेत रहेका मन्त्री बास्कोटाले सबैको सहकार्यले मात्रै देश समृद्ध हुने भन्दै राम्रो काममा हातेमालो गर्न सरकार तयार रहेको स्पष्ट पारे ।