कास्की, १८ कात्तिक: युवा तथा खेलकूदमन्त्री जगतबहादुर विश्वकर्माले विद्यार्थीको मनोभावना बुझेर शिक्षण गर्नु आवश्यक रहेकामा जोड दिनुभएको छ । नेशनल प्रोग्राम सेन्टरले यहाँ आयोजना गरेको ‘विद्यालयमा मनोविज्ञान’ विषयक दुई दिवसीय कार्यशाला गोष्ठीमा मन्त्री विश्वकर्माले विद्यालयलाई सवल बनाउन र सिक्ने सिकाउने प्रणालीलाई प्रभावकारी बनाउन पनि मनोविज्ञानले काम गर्ने बताउनुभयो ।

गण्डकी प्रदेशसभा सदस्य मित्रकुमारी सुवेदीले शिक्षकले विद्यार्थीको मनोविज्ञानअनुसार शिक्षण गरे सिकाइको लक्ष्य हासिल हुने भनाइ राख्नुभयो । प्रमुख प्रशिक्षक एवं मानसिक रोग विशेषज्ञ प्राध्यापक डा सुशील कँडेलले विद्यालयमा मनोविज्ञानको आवश्यकता, महत्व र सिकाइलाई मनोविज्ञान बुझेर कसरी प्रभावकारी बनाउने भन्नेबारेमा सहभागीलाई अभिमुखीकरण गर्नुभएको थियो । कार्यक्रममा देशभरबाट सामुदायिक तथा निजी गरी ८० विद्यालयका १८७ जना शिक्षक सहभागी थिए ।
-रासस