भक्तपुर, १७ असोज । दिउसोमा संचालन गर्न रोक लगाइएको टिपरलाई छुट दिएकै दिन काठमाडौंमा भयानक दुर्घटना भएको छ । निर्माण सामग्रीको ढुवानीमा असर परेको भन्दै टिपरलाई साँझ ७ बजे नै काठमाडौं प्रवेश गर्न दिइएको थियो । बुधवारवाटै दिइएको छुटको दुरुपयोग भएको छ । निर्णय भएकै दिन टिपरले मोटरसाइकललाई ठक्कर दिँदा दुई जना गम्भीर घाइते भएका छन् ।

टिपरका कारण दिनहुं दुर्घटनामा मृत्यु हुनेको संख्या बढ्न थालेपछि राति ८ वजेसम्म टिपलाई काठमाडौं प्रवेशमा रोक लगाइएको थियो । साउन १ देखि उपत्यकामा बिहान ५ बजेदेखि बेलुकी ८ बजेसम्म टिपर चलाउन रोक लगाइएको थियो । भक्तपुरले सांझ साँगा चोकमै टिपर रोक्ने गरेको थियो । तर, बुधबार काठमाडौंमा प्रमुख जिल्ला अधिकारी रामप्रसाद आचार्यको अध्यक्षतामा बसेको जिल्ला सुरक्षा समन्वय समितिको वैठकले निर्माणको कार्यमा असर गरेको ठहर गर्दै टिपर संचालन समय बढाएको थियो ।

विहान ७ देखि बेलुकी ७ बजेसम्म मात्र टिपरलाई रोक्ने निर्णय भएको केही घण्टा नबित्दै भयानक दुर्घटना भएको हो । भक्तपुर जिल्ला प्रशासनले पनि चार दिन अघि टिपरलाई साँगा चोकको साटो सल्लाघारीमा रोक्ने निर्णय गरेको छ । काठमाडौं र भक्तपुर प्रशासनले टिपर सञ्चालनको व्यवस्था परिवर्तन गरेलगत्तै दुर्घटना भएको छ । बुधबार साँझ बा ४ ख ३६५० नम्बरको टिपरले सूर्यविनायकमा बा ८८ प ८५२ नम्बरको मोटरसाइकललाई ठक्कर दिँदा एक जनाको मृत्यु भएको छ भने एक जना गम्भीर घाइते भएका छन् । उनीहरुको परिचय भने खुलेको छैन । घटनापछि आक्रोशित भीडले टिपरमाथि आगजनी गरेको छ भने स्थितिलाई नियन्त्रणमा लिन प्रहरी अश्रुग्यास प्रहार गरेको छ । अहिले पनि तनाव कायमै छ