गाईघाट, १३ कात्तिक : उदयपुरको बेलका नगपालिका–३ स्थित मूर्ति खोलामा आज अपराह्न स्थानीय युवाले माछा मार्ने क्रममा मगर गोही भेटाएका छन् । करीब पाँच फिट लम्बाइ र ६० सेन्टिमिटरभन्दा बढी चौडाइको गोही मूर्ति खोलामा फेला परेको स्थानीयवासीलाई उद्धृत गर्दै डिभिजन वन कार्यालय उदयपुरका प्रमुख विष्णुप्रसाद आचार्यले जानकारी दिनुभयो ।

सामान्य घाइते उक्त गोहीलाई वन कार्यालयका कर्मचारीले उपचारका लागि कोशी टप्पु वन्यजन्तु आरक्षण केन्द्रमा बुझाएका छन् । सप्तकोशीबाट साना बच्चा हुँदा बर्खायाममा नै मूर्तिखोलामा प्रवेश गरेर उक्तगोही हुर्केको हुन सक्ने बताइएको छ । बेलका क्षेत्रमा १५ फिटसम्म लम्बाइ भएका अजिङ्गर, सालकलगायत मगरगोहीजस्ता दुर्लभ जन्तु वृद्धि भएर फैलँदै जान थालेको वन कार्यालयले जनाएको छ ।