काठमाडौं, कात्तिक ८ : गृह मन्त्रालयले कन्चनपुरकी १३ वर्षीया बालिका निर्मला पन्त बलात्कारपछिको हत्या प्रकरणमा निलम्बित कन्चनपुरका तत्कालीन प्रहरी प्रमुख प्रहरी उपरीक्षक (एसपी) डिल्लीराज विष्ट र प्रहरी निरीक्षक जगदीशप्रसाद भट्टलाई बर्खास्त गरेको छ ।बलात्कारपछिको हत्या प्रकरणको छानबिनमा लापरबाही गरेको भन्दै बिहीबार विष्ट र भट्टलाई प्रहरी सेवाबाटै बर्खास्त गरिएको हो ।

उनीहरुलाई प्रहरी प्रधान कार्यालयको सिफारिसमा गृह मन्त्रालयले बर्खास्त गर्ने निर्णय गरेको हो ।विष्ट र भट्टसँग दुईपटक स्पष्टीकरण सोधिएपनि उनीहरुबाट चित्तबुझ्दो जवाफ नआएकाले सेवाबाटै बर्खास्त गरिएको गृह मन्त्रालयले जनाएको छ ।

निर्मलाको बलात्कारपछि हत्या भएको अवस्थामा गत साउन ११ गते शव फेलापरेको थियो ।प्रहरी प्रशासनले अहिलेसम्म हत्यारालाई पक्राउ गर्न सकेको छैन ।विष्ट र भट्टलाई गृह मन्त्रालयले ‘भविष्यमा सरकारी सेवाका लागि अयोग्य नठरिने’ गरी बर्खास्त गरिएको जनाएको छ । यसबाट भने विष्ट र भट्टले पुनः सरकारी जागिर खानसक्ने देखाएको छ ।