बनियानी, झापा, २२ भदौ: खानेपानीमन्त्री बीना मगरले तीन वर्षभित्र घरघरमा आधारभूत पानी पु¥याइने बताउनुभएको छ । झापाको विर्तामोडस्थित विर्तामोड साना शहरी खानेपानी तथा सरसफाइ संस्थाको नवर्निमित पानी प्रशोधन उपकरण (फिल्टर प्लान्ट)–को आज उद्घाटन गर्दै मन्त्री मगरले भन्नुभयो, “ तीन वर्षभित्र सबै नेपालीको घरमा आधारभूत पानी पु¥याउने लक्ष्यका साथ गृहकार्य भइरहेको छ ।”

दूषित पानीकै कारण ८२÷८३ वटा रोग लाग्ने गरेको बताउँदै उहाँले सरकारले शुद्ध खानेपानीमा ध्यान दिनुपर्नेमा जोड दिनुभयो । झापाको मेची, कनकाइलगायत नदी–हिमनदीको पानीलाई व्यावसायीकरण गर्ने बताउँदै उहाँले आठवटा ‘वाटर ब्लक’ निर्माणको तयारी भइरहेको जानकारी दिनुभयो । “मेचीदेखि महाकालीसम्मको पानीलाई पाइपलाइनमार्फत् अन्तर्राष्ट्रिय बजारमा पु¥याउने योजना छ”, उहाँले भन्नुभयो । कार्यक्रममा संस्थाका अध्यक्ष जलकुमार गुरुङले असोज १ गदेखि विर्तामोड नगर क्षेत्रमा चौबिसैँ घण्टा पानी वितरण गरिने बताउनुभयो ।

खानेपानी मन्त्रालयले उपलब्ध गराएको रू ५५ लाखको लागतमा पानी प्रशोधन उपकरणबाट दैनिक १३ हजार ५० हजार लिटर पानी प्रशोधन हुने संस्थाका सचिव मेघराज बाँस्तोलाले जानकारी दिनुभयो ।

‘झापाबाट समाजवाद शुरु’
यसैगरी नेपाल कम्युनिष्ट पार्टीका नेता एवं सांसद सुरेन्द्र कार्कीले ‘बालबालिकालाई निःशुल्क दूध’ अभियानको आज शुभारम्भ गर्नुभएको छ । झापाको मेचीनगर–१२ शहरेडाँगीस्थित सरस्वती बाल कल्याण माविका बाल कक्षामा अध्ययनरत बालबालिकालाई दूध सेवन गराउँदै सांसद कार्कीले अभियान शुभारम्भ गर्नुभयो । ‘धरतीका निम्ति गोबर मल, बालबालिकाको निम्ति एक ग्लास दूध बनेर आउनेछ समाजवाद’ भन्ने नाराका साथ आजदेखि अभियान शुरु गरिएको हो ।

सांसद कार्कीले बालबालिकालाई निःशुल्क दूध उपलब्ध गराउने प्रतिबद्धता जनाउनुभएको थियो । सोही प्रतिबद्धताअनुरुप अभियान शुरु गरिएको हो । कार्यक्रममा विद्यालयका ६८ जना बालबालिकालाई दूध सेवन गराइएको थियो । उनीहरुलाई दैनिक एक ग्लास दूध निःशुल्क उपलब्ध गराइने छ ।
पूर्वसञ्चारमन्त्रीसमेत रहनुभएका कार्कीले भन्नुभयो, “समाजवाद भनेको नहुनेलाई हुन दिने हो, आफूसँगै समाजलाई पनि अघि बढाउने हो, आजदेखि झापाबाट समाजवाद शुरु भयो ।”
-रासस