सिन्धुपाल्चोक/ झट्ट सुन्दा अचम्म लाग्न सक्छ । के गोरुले पनि दूध दिन्छ ? एक ताका गायिका तारा थापा र रामथापाले त लोक गीत नै बनाए ‘गोरु भ्याउँदैन भनेर ।’ तर अचम्म मान्नु पर्ने कुरै रहने । सिन्धुपाल्चोकमा एक गोरुले गाईले जस्तै दूध दिएर सबैलाई चकित बनाइदिएको छ ।

जिल्लाको हेलम्बु गाउँपालिका वडा नम्बर ६ इचोक, पुरानागाउँका सोनाम तामाङले पालेको गोरुले दूध दिन थालेपछि अहिले उनको गोठमा हेर्न जानेको दिनहुँ घुईचो लाग्न थालेको छ । तामाङका अनुसार गएको जेठ महिनाबाट गारुले दूध दिन लागेको हो । गोरुले लैनु गाई र भैसीले झै बिहान, बेलुका नै दुध दिने गरेको छ । ‘बिहान, बेलुका गरी एक मानाभन्दा बढी दूध दिन्छ, गोरु धनी तामाङले भने ‘चारमध्ये २ वटा थुनबाट दूध आइरहेको छ ।’

सोनामले उक्त गोरु आफ्नै भाई फते तामाङबाट झण्डै एकवर्ष अघि किनेर लगेका थिए । गाउँपालिकाको पशु शाखा प्रमूख टोप बहादुर बरुवालले गोरुले दूध दिएको खबर सुनेपछि गाउँपालिकाका प्रमूखको नेतृत्वमा सोनामकै गोठमा एक टोली पुगेर जानकारी लिएको बताए । ‘बिहान, बेलुका गरी एक मानाको हाराहारीमा उक्त गोरुले दूध दिने गरेको स्वीकार गर्दै उनले भने ‘हामीलाई पनि निकै अनौठो लाग्यो, यसको अनुन्धानका लागि केन्द्रिय अनुन्धान टोली नै आउने जानकारी पाएका छौँ ।’

ब्याउँदै नब्याइ गोरुले दूध दिएपछि सबै चकित बनेका छन् । सोनामको गोठमा पुग्नेहरुले भगवानको प्रसादको रुपमा दूध खाने गरेका छन् ।