काभ्रेपलाञ्चोक जिल्लाको बेथानचोक गाउँपालिका अन्तर्गतका सबै वडा कार्यालयहरुमा विद्यूतीय मेसिनबाट हाजिरी सुरु गरिएको छ ।

गाउँ पालिकालाई प्रविधि मैत्री बनाउने उद्देश्यका साथ शुत्रबार देखि विद्यूतीय हाजिरी मेसिन सञ्चालनमा ल्याइएको हो । साथै आगामी दिनमा बेथानचोक गाउँपालिका भित्रका स्वास्थ्य चौकी, विद्यालयहरूमा पनि इ–हाजिरी जडान गरिने गाउँपालिकाका प्रमुख प्रशासकीय अधिकृत टेकराज आचार्यले जानकारी दिए । ‘अहिले वडा कार्यालयहरुमा मात्रै विद्यूतीय हाजिरी मेसिन जडान गरिएको छ, उनले भने ‘हामी गाउँपालिकाका स्वास्थ्य चौकी र विद्यालयमा पनि हाजिरी प्रणाली विद्यूतीय माध्यमबाटै गर्छौँ ।’ बेथानचोक गाउँपालिकामा ६ वडा रहेका छन् ।

विद्यूतीय हाजिरी मेसिन सञ्चालनमा ल्याएपछि गाउँपालिका र वडा कार्यालयहरु गर्ने सम्पूर्ण कार्यहरू स्वच्छ, पारदर्शी र कर्मचारीहरूलाई नियमित गराउने गाउँपालिकाका प्रमूख पे्रम बहादुर तिमल्सिनाले बताए । यसैबीच गाउँपालिकाले शुक्रबार नै पालिकाको कार्यालयलमा सीसीटिभी समेत जडान गरेको छ । ‘गाउँपालिकाको कार्यालयबाट गरिने सबै काम स्वच्छ र पारदर्शी गराउने हाम्रो प्रतिबद्धता हो, गाउँपालिकाका प्रमूख प्रेम बहादुर तिमल्सिनाले भने ‘जनताको सेवा गर्छु भनेर आएपछि जनप्रतिनिधि हुन वा कर्मचारी कसैले पछि दायाबाया गर्न पाइदैन् ।’