काठमाडौं, साउन ३१ : गृह मन्त्रालयले काठमाडौं र ललितपुर प्रहरी प्रमुखसहित २७ वरिष्ठ प्रहरी उपरीक्षक (एसएसपी) को सरुवा गरेको छ। काठमाडौ परिसरमा वसन्त लामालाई जिम्मेवारी दिइएको छ भने ललितपुर प्रहरी प्रमुखमा रविन्द्र धानुकलाई पठाइएको छ। काठमाडौमा आएका लामा ३८ किलो सुन तस्करी छानबिन समितिका सदस्य थिए। बुधबार नै चार प्रहरी नायब महानिरीक्षक (डीआईजी) को पनि सरुवा गरेको छ।

प्रहरी प्रधान कार्यालयका डीआईजी महेशविक्रम शाह प्रदेश प्रहरी कार्यालय प्रदेश ६ सुर्खेत, सुर्खेतमा रहेका सुरेशविक्रम शाह प्रहरी प्रधान कार्यालय तालिम निर्देशनालय, प्रहरी प्रधान कार्यालय सुरक्षा सेवा व्यवस्थापन निर्देशनालयका सुरेश केसी प्रदेश प्रहरी कार्यालय प्रदेश ७ दिपायल र प्रहरी प्रधान कार्यालय अपराध अनुसन्धान विभागका धिरु बस्नेत प्रहरी प्रधान कार्यालय सुरक्षा सेवा निर्देशनालय नक्साल सरुवा भएका हुन्।