काठमाडौं, साउन २९ । नेपालका लागि भारतीय राजदूत मन्जीभसिंह पुरीले नेपाल भारतको प्राथमिकतामा परेको भन्दै प्रधानमन्त्री नरेन्द्र मोदी चौथोपटक नेपाल आउन लागेको जानकारी दिएका छन् ।मंगलबार काठमाडौंमा आयोजित साक्षात्कार कार्यक्रममा उनले आउँदो भदौ १४ र १५ गते काठमाडौंमा हुने बिम्स्टेक सम्मेलनका लागि मोदी नेपाल आउने बताए ।

सोक्रममा प्रधानमन्त्री मोदीले पशुपति धर्मशालाको उद्घाटन गर्ने कार्यक्रमसमेत रहेको उनले जानकारी दिए ।भारतले तराईमा हुलाकी राजमार्ग निर्माणका लागि थप ४० करोड रुपैयाँ सहयोग गर्ने जानकारी दिँदै उनले जलविद्युत् आयोजना, रेलमार्ग, विराटनगर र वीरगन्जमा थप बन्दरगाह निर्माणमा पनि भारतले सघाउने बताए ।

कार्यक्रममा नेपाली कांग्रेसका नेता एवं पूर्वपरराष्ट्रमन्त्री डा. प्रकाशशरण महतले भारत र नेपालबीच ‘अम्रेला एग्रीमेन्ट’ आवश्यक रहेको भन्दै त्यसे हुनसके सिँचाइ, खानेपानी र जलविद्युत्मा सहयोग पुग्ने बताए ।