काठमाडौं । गृहमन्त्री रामबहादुर थापाले राज्यलाई धोका दिने जोसुुकै भए पनि कारबाही गरिने बताएका छन् । ठेकेदार कम्पनी सञ्चालकप्रतिस लक्षित गर्दै उनले भने, ‘अध्यक्ष प्रचण्डको घरधनी होस्, सांसद होस् वा ठूलै नेता किन नहोस् सबैले कानुनलाई मान्नु पर्छ । यदि राज्यको कानुनलाई मान्दैन, कनुन मिच्ने काम गर्दछ र राज्यलाई धोका दिन्छ भने सबैलाई कारबाही हुन्छ ।’ ठेकेदारले समयमा काम पूरा नगरेमा वा ठेक्काको अवहेलना गरेमा त्यसलाई सरकारले गैरकानुनी र ठगी ठान्ने बताउँदै उनले हिजो बुधबार गृहमन्त्रालयमा आयोजित पत्रकार सम्मेलनमा त्यस्ता सबैलाई कारबाही हुने बताएका हुन् ।

पत्रकार सम्मेलनमा उनले सुनकाण्डमा एक पछि अर्को पक्राउ परिरहेका र नयाँ तथ्यहरु खुलिरहेको पनि बताएका छन् । गृहमन्त्री थापाले साढे ३३ किलो सुन तस्करी काण्डमा संलग्नहरु एकपछि अर्को पक्राउ परिरहेका र अनुसन्धान जारीरहेको बताएका हुन् । माछा मार्ने क्रम जारी छ, उनले भने ‘‘अहिलेसम्म साना र मझौला माछा मात्रै परेका छन् । अब आशा गरौं ठूला माछा पनि पर्न सक्छन् ।’