जिल्लामा एउटा मात्रै भएपनि विमानस्थल बनाउने काभ्रेलीहरुको सपना लगभग दुई दशकपछि पूरा हुने भएको छ । राजधानीबाट निकै नजिक रहेको जिल्ला काभ्रेमा विमानस्थल बन्ने सुनिश्चि भएको हो । मंगलबार नागरिक उड्यन तथा पर्यटनमन्त्री रविन्द्र अधिकारी नेतृत्वको टोलीले जिल्लाको तीन स्थानको स्थलगत रुपमा अवलोकन समेत गरेको छ ।

काठमाण्डाैबाट विषय विशेषज्ञ टोलीको नेतृत्व गर्दै काभ्रे आइपुगेका मन्त्री अधिकारी र सुचना तथा सञ्चार राज्य मन्त्री गोकुल बास्कोटाले एकै स्वरमा एउटै मञ्चबाट भने अब विमानस्थल पक्का बन्छ । पर्यटनमन्त्री अधिकारीको टोलीले बनेपाको नागीडाँडा, धुलिखेलको देविस्थानडाँडा ठूलीचौर र पात्लेखेतको चिसापानी ठूलीचौरको स्थलगत अवलोकन गरेको थियो । यी तीनै ठाउँमा यसअघि पनि पटक पटक विमानस्थलको सम्भाब्यताबारे अध्ययन भने नभएको होइन् । तर अस्थीर सरकारका कारण अहिलेसम्म कार्यान्वयनमा आउन सकेको थिएन् ।

देशको एक मात्र त्रिभूवन विमानस्थलमा अत्याधिक विमानको चाप बढेपछि सरकारले काभ्रेमा बैकल्पिक एयरपोर्ट कुनै पनि हालतमा बनाउने बताएको छ । पर्यटनमन्त्री सहितको टोली विमानस्थलको जग्गा हेर्न स्थलगत रुपमै आएपछि अहिले जिल्लामा एयरपोर्ट निर्माणको बहस चुलिएको छ । मन्त्री अधिकारीसँग  जिल्लाका जनप्रतिनिधिपनि स्थलगत अवलाेकनमा सहभागि भएका  थिए ।

हाम्रो सपना पुरा हुदैँछःमन्त्री बास्कोटा
हामीले काभ्रेमा एउटा एयरपोर्टको कल्पना गरेको बर्षौ भइसक्यो । त्यो कल्पना काठमाण्डौमा विमानको चाप नियणन्त्र गर्ने उद्देश्यले थिएन् । हामीले परिकल्पना गरेको सत्य कुरा के थियो भने हामी तीब्र आर्थिक विकास चाहान्थ्यो । त्यो तीब्र आर्थिक विकासको सम्भावना भनेको पर्यटन क्षेत्र हो ।

काभ्रे जिल्ला पर्यटन क्षेत्रका लागि अत्यन्तै उर्वभर भूमि मानिन्छ । कुहिरोका कारण काठमाण्डौमा पर्यटन क्षेत्र प्रभावित हुदैँ आइरहेको थियो । त्यसैले हामी काठमाण्डौ नजिकैबाट एउटा स्थान दिन चाहान्थ्यौ । जहाँबाट देशभर जाने पर्यटकहरु सहजरुपमा जान सकून । त्यो भनेको टुईनटर विमानस्थलको परिकल्पना गरेका थियौँ ।

त्यसैले काभ्रेमा एउटा विमानस्थल चाहिन्छ । चाहे त्यो त्रिभूवन विमानस्थलको बैकल्पिक भएपनि नभएपनि । किन भने काठमाण्डौँ सहरको नै बैकल्पिक काठमाण्डौ काभ्रे जिल्ला बन्दै छ । काठमाण्डौ विस्तार हुने भनेको काभ्रे नै हो । किन भने हेटौँडा जान सुरुङ मार्ग खन्नुको विकल्प छैन् । काठमाण्डौ आफै जोडिएर विकास भएको ठाउँ नै काभ्रे हो । त्यहि भएका कारण यो जिल्लाको उपयुक्त ठाउँमा एउटा विमान स्थल चाहन्छ भन्ने हो । माननीय पर्यटनमन्त्री ज्यू आउनु भएको छ र हाम्रो प्रयासलाई सार्थक बनाउने उहाँको टोली र म आफै पनि । मेरो मन्त्रालयले यसमा खास भूमिका त राख्दैन । तर पनि ब्यक्तिगतरुमा यो कार्यका लागि उहाँलाई झकझक्याई रहने छु ।

अब विभिन्न बहानामा विमानस्थल निर्माण गर्न नदिने बाटोमा कोहि पनि लाग्नु हुदैन् । तपाईहरुलाई थाहा नै छ । नेपालमा समुन्द्र छैन् । तर समुन्द्र दुषित भएकै कारण हाम्रो हिमाल प्रदुषित हुन्छ । त्यसैले कहाँ, कहाँ प्रदुषित हुन्छ । जंगल कहाँ मासिनुपर्छ, कहाँ मासिनु हुदैँन् । क्षतिपूर्ती कहाँ तिर्नुपर्दैन, कहाँ धेरै तिर्नुपर्छ । हामी प्रसस्त पैसा भएर विमानस्थल बनाउन लागिरहेका छैनौँ । हामीसँग भएका स्रोत र साधनलाई बढी प्रयोग गरेर कम मूल्यमा र छिटो सकाउनेमा छौँ । त्यसैले वातावारणको कुरा निकालेर विकास हुन दिदैँनौँ भन्नु मुर्खता हो ।

१५ दिनभित्र एयरपोर्टको स्थान टुंगो लाग्छः मन्त्री अधिकारी
म आज काभ्रेमा विभिन्न विषय विशेषज्ञ सहितको टोली लिएर एयरपोर्टको जग्गा हेर्न आएको हुँ । म सहितको टोलीले काभ्रेको तीन ठाउँमा सम्भावित स्थलहरुको अवलोकन गरेका छौँ । अबको एक दुई दिनभित्रै एउटा विषय विशेषज्ञ समिति बनाउनेछु । र १५ दिनभित्र एयरपोर्टका लागि उचित स्थान छनौट भएको खबर काभ्रेली जनताले सुन्न पाउनु हुनेछ ।

म पर्यटन मन्त्री भइसकेपछि एक सय दिनको कार्य योजनामा पनि आन्तरिक विमान स्थलको कुरा उल्लेख गरेको थिए । यसअघि पनि यी ठाउँहरुमा एयरपोर्टको सम्भाब्यता अध्ययन भइसकेका छन् । त्यसैले आजको स्थलगत अध्ययन, पहिले भएका अध्ययनलाई समेत पुनःअध्ययन गरेर छिट्टै टुंगोमा पुर्याउने छौँ । यो एयरपोर्ट आन्तरिक जहाजहरुका लागि हुने छ । यो निर्णय लिदाँ स्थानीयको भावना, देशको आवश्यकता, लगानी, उडान र अवतरणको रुटलाई पनि ध्यानमा दिएर प्रतिवेदन आउँछ । त्यसैको आधारमा मन्त्रालयले काम अघि बढाउँछ ।
यो एयरपोर्टले काभ्रेको आवश्यकतालाई पनि पुरा गर्छ । त्रिभूवन विमानस्थलको चापलाई पनि कम गराउने भएकाले छिट्टो बन्छ । सबैको सल्लाह सुझावका आधारमा काभ्रे जिल्लामा विमानस्थल बन्छ । यसमा कुनै दुविधा छैन् ।

के भन्छन स्थानीय
जिल्लाको तीन ठाउँको विमान स्थल निर्माणका लागि जग्गा स्थलगतरुपमा पर्यटनमन्त्रीको टोलीले अवलोकन गरेपछि धुलिखेलमा अन्तरक्रिया भएको थियो । बनेपाको नागीडाँडा आसपासका स्थानीयहरुले हरेक हिसाबले यहि ठाउँ उपयुक्त भएको मन्त्रीलाई बताएका छन् भने धुलिखेलका केहिले देविस्थान डाँडामा विमानस्थल बनाउँनै नहुने तर्क गरे । बनेपा नगरपालिका वडा नम्बर ११ का वडाध्यक्ष शिवकुमार थापाले नागीडाँडा सबै हिसाबले उपयुक्त भएको भन्दै यहि ठाउँमा एयरपोर्ट बनाउन प्रस्ताव गरे । देव कुमार तामाङले पनि नागीडाँडा उपयुक्त भएको मन्त्रीलाई सुनाए ।

धुलिखेलका पर्यटन ब्यवसायी अरुण श्रेष्ठले देवीस्थान डाँडामा कुनै पनि हालतमा विमानस्थल बनाउन उपयुक्त नभएको तर्क गरे । उनले दीर्घकालिन सोच बनाएर मात्रै अघि बढ्न आग्रह गर्दै वन बिनास गरेर विकास नगर्न आग्रह गरे । तर धुलिखेल नगरपालिका वडा नम्बर ११ का वडाध्यक्ष विष्णु धितालले भने विमान निर्माणका लागि आफु जस्तो सुकै पहल गर्न पनि तयार रहेको भन्दै धुलिखेलमै विमानस्थल बनाउन मन्त्री समक्ष प्रस्ताव गरे ।

जग्गाको भाउ ह्वात्तै बढ्यो
विमानस्थल बन्ने हल्लाले बनेपा, धुलिखेल, पनौती लगायतका स्थानमा जग्गाको भाउ ह्वात्तै बढेको छ । अघिल्लो दिनसम्म सुनसान रहेका ठाउँमा विमानस्थलको जग्गा हेर्न भनिएको सम्भावित ठाउँहरुमा रातारात जग्गा कारोबारमा संलग्न एजेन्टहरु पुगेर जग्गा खरिद बिक्री गरेको स्थानीयहरुले बताएका छन् ।

नागीडाँडामा विमानस्थल भन्ने लगभग सुनिश्चित जस्तै देखिएको भन्दै हल्ला फैलिएपछि जग्गा कारोबारीहरु सल्बाएका हुन् । उनीहरुले जग्गा धनीलाई ललाई फकाई, दोब्बरसम्म मूल्य तिर्न आफुहरु तयार रहेको भन्दै गाउँ पुगेको स्थानीयहरुले बताए । पर्यटनमन्त्रीले अवलोकन गरेको तीन स्थान मध्ये १५ दिनपछि मात्रै उपयुक्त स्थानको छनौट भइसक्ने बताएपनि आजैबाट विमानस्थल बन्न सुरु भएजसरी जग्गाको भाउ बढाइएको छ ।