जल पर्यटकहरुका लागि उत्कृष्ट र अाकर्षक गन्तब्य स्थल काभ्रेको दोलालघाटमा हुने महोत्सवको तयारी तीब्र पारिएको छ । चैत २३ गते सुरु भएर २०७५ बैशाख ४ गते समापन हुने महोत्सवको स्टेज निर्माण देखि प्रचारप्रसारलाई तीब्र पारिएको हो ।

‘प्राकृतिक, साँस्कृतिक, कृषि र ब्यापार, दोलालघाट पर्यटन ब्यवद्र्धन विकासको आधार’ भन्ने मुल नाराका साथ ११ दिनसम्म चल्ने महोत्सवको आयोजना दुलालेश्वर वातावरणीय तथा समाज सेवा क्लबले गरेको हो । इन्द्रावती नदी बगरमा अहिले १ सय वटा स्टलका लागि तयारी गरिएको क्लब अध्यक्ष अष्ट बहादुर श्रेष्ठले जानकारी दिए । महोत्सवमा लोकल माछा, लोकल अचार, स्वास्थ्य शिविर देखि रेडिमेड कपडा, भाडाँकुडा लगायतका स्टल रहने छन् । बाल उद्यन रमाइलो मेला पनि हुनेछ । नयाँ वर्षलाई लक्षित गरी विभिन्न मनोरञ्जनात्मक कार्यक्रम समेत हुने छ ।

४० हजार जनाले महोत्सव अवलोकन गर्नेमा २ करोड बराबरको आर्थिक कारोबार हुने अध्यक्ष श्रेष्ठले बताए । “अहिले महोत्सव ब्यवस्थापनको काम धमाधम भइरहेको छ, उनले भने “यो महोत्सवमा दोलालघाट आसपास र जिल्ला भित्र उत्पादन भएका विभिन्न वस्तुहरुको स्टल प्रर्दशनिका लागि राखिने छ ।” महोत्सवमा हेलिकप्टर चढेर जिल्लाका विभिन्न तिर्थस्थलहरुको अवलोकन गर्न सक्ने ब्यवस्था समेत मिलाइएको छ । त्यस्तै इन्द्रावती र सुनकोशी नदीमा र्याफटिङ गर्न पनि आयोजकले ब्यवस्था मिलाएको महोत्सव मुल आयोजक समितिका संयोजक समेत रहेका क्लबका अध्यक्ष श्रेष्ठले बताए ।