छोटो समयमै यात्रुहरुको रोजाईमा परेको मयूर यातायात प्रालिले काभ्रे र सिन्धुपाल्चोक जिल्लाको विभिन्न गाउँमा समेत आफुहरु जान तयार रहेको बताएको छ । शनिबार बनेपामा पत्रकार सम्मेलन गरे उसले सरकारले गाउँ गाउँ जाने रुट अनुमति दिने हो भने यातायात सञ्चालन गर्न आफुहरु इच्छुक रहेको बताएको हो ।

आमाबच्चा सिट देखि फ्रि वाईफाई सम्मको सुविधा सहित सञ्चालनमा आएको मयूर यातायात प्रालिका बस विरुद्ध कोटेश्वर पूर्वका १३ यातायात ब्यवसायी समितिले आइतबारबाट आन्दोलन गर्ने घोषणा गरेका छन् । मूयर यातायात प्रालिका सचिव रामबहादुर केसीका अनुसार काभ्रे बस ब्यवसायी संघ, काभ्रे मिनी बस सेवा समिति लगायतका ब्यवसायीहरुले मयूरका १० वटा गाडी तोडफोड गरेका छन् । ४ वटा बस चल्नै नसक्ने गरि तोडफोड भएको उनले बताए ।

मयूरका बस अहिले पनि प्रहरी स्कटिङमै सञ्चालन भइरहेका छन् । भक्तपुरका विभिन्न चोक र बनेपाको चारदोबाटोमा कुरेर बसेका अन्य यातायात ब्यवसायीहरुले मूयरका बसमा चढ्न लागेका यात्रुहरुलाई ओलार्ने देखि ढुंगा हान्ने सम्मका गतिविधि गर्दै आइरहेका छन् । यातायात व्यवस्था विभागले एक सूचना प्रकाशित गर्दै इजाजत लिएर सवारी नचलाए यातायात व्यवस्था ऐन २०४९ र यातायात व्यवस्था नियमावली २०५४ र अत्यावश्यक सेवा ऐन बोमोजिम हदैसम्मको कारवाही हुने चेतावनी दिएको छ ।

पुराना ब्यवसायीका मजदुर भन्छनः बन्द भन्दा प्रतिस्पर्धा गर्नुपर्छ
काभ्रे बस ब्यवसायी समिति र काभ्रे मिनी बस सेवा समितिका बसहरुको आम्दानी अहिले आधा भन्दा बढी घटेको छ । मयूर यातायात प्रालिका बस बनेपासम्म सञ्चालनमा आउनुु अघि एक टिपमा ५ हजारसम्म उठाउँदै आएका थिए ।

शनिबार साझँ बनेपाबाट धुलिखेल आउने बसका चालक र सह चालक बन्दले समस्या समाधान नहुने भन्दै प्रतिस्पर्धा गर्नु पर्ने बताउँदै थिए । नाम उल्लेख नगर्ने सर्तमा उनले भने “अहिले आम्दानी त आधा घटेको छ, तर बन्द गरेर समस्याको समाधान हुदैँन्, प्रतिस्पर्धा गर्नुपर्छ ।” नयाँ समितिले बससँगै सुविधा पनि थपेकाले मयूरमा चढ्नेको संख्या ह्वात्तै बढेको उनीहरुले बताए ।