मनाङ–मर्स्याङ्दी क्लब बुटवलमा जारी तेस्रो मदन भण्डारी अन्तर्राष्ट्रिय गोल्डकप फुटबल प्रतियोगिताको सेमिफाइनलमा प्रवेश गरेको छ । बिहीबार भएको अन्तिम क्वार्टरफाइनल खेलमा नेपाल पुलिस क्लबलाई २–१ ले पराजित गर्दै मनाङ अन्तिम चारमा पुगेको हो । खेलमा मनाङलाई जिताउनेक्रममा अन्जन विष्टले दुई गोल गरे भने पराजित पुलिसका तर्फबाट तेज तामाङले एक गोल फर्काए । खेलको ‘म्यान अफ दी म्याच’ पनि अन्जन विष्ट नै घोषित भए ।

योसँगै प्रतियोगिताको सेमिफाइनल समीकरण पनि पूरा भएको छ । यसअघिका खेलमा विजयी हुँदै आयोजक मदन भण्डारी स्पोर्टस् एकेडेमी काठमाडौं, रुपन्देहीको सुनौलो संगम क्लब र थ्रीस्टार क्लबले सेमिफाइनलको यात्रा तय गरिसकेका छन् । प्रतियोगिताको पहिलो सेमिफाइनल खेलमा शुक्रबार मदन भण्डारी एकेडेमी र थ्रीस्टारबीच प्रतिस्पर्धा हुनेछ ।