सूचना तथा सञ्चार प्रविधि राज्यमन्त्री गोकुल बास्कोटा पार्टी  प्रधानमन्त्री तथा एमाले अध्यक्ष केपी शर्मा ओलीको घरमा सरेका छन् । मन्त्री क्वार्टरमा ठाउँ खाली नभएपछि घर खोज्दै हिँडेका बास्कोटा रामनवमीकै साइतमा ओली निवासमा सरेका हुन्र ।

प्रधानमन्त्री ओलीको परिवार सरकारी निवास बालुवाटार सरेपछि यो घर खाली थियो । जहाँ अब सूचना तथा सञ्चार राज्यमन्त्री बास्कोटाले डेरा जमाएका छन् । प्रधानमन्त्रीज्यूको सरकारी सम्पत्ति सदुपयोगको सिद्धान्त आफुले लागुको गरेको बास्कोटाले बताए । बास्कोटाले ओलीको बालकोटस्थित घरमा बसुन्जेल मन्त्रीले आवास वापत पाउने भाडा रकम समेत नलिने बताए ।

एमालेको राजनीतिमा सधैं ओलीको निकट रहेर काम गरेका बास्कोटाले यसपटक प्रतिनिधिसभा निर्वाचनमा पनि ओलीपछि दोस्रो लोकप्रिय मत पाएर विजय हासिल गरेका थिए । ओलीले बास्कोटालाई मन्त्री क्वार्टर नपुगेपछि आफ्नै घरमा बस्न स्वीकृति दिएका हुन् । मन्त्रीहरुका लागि राज्यले ललितपुरको पुल्चोकस्थित हरिहर भवनमा मन्त्री क्वार्टरको व्यवस्था गरेको छ । तर, सबै मन्त्रीलाई पुल्चोकमा पर्याप्त भवन नभएपछि काठमाडौंमा घर हुने आफ्नै घरमा बस्छन् भने अरुले घरभाडा पाउने गर्छन् ।

काभ्रेपलाञ्चोकको मण्डन देउपुर नगरपालिकाका स्थायी बासिन्दा बास्कोटाको भक्तपुर लोहकिल्थलीमा ३ कोठे एकतले घर छ । तर, सुरक्षाकर्मी बस्ने र गाडी राख्ने ठाउँ समेत नभएपछि बास्कोटाले झण्डा र डण्डा (सुरक्षाकर्मी) लाई फर्काउने गरेका थिए । प्रधानमन्त्रीले आफ्नो क्याबिनेटका मन्त्रीलाई आवासका लागि आफ्नै घर उपलव्ध गराएको यो पहिलो घटना हो ।