फागुन २३ काभ्रे । सरकारले पहिलो किस्ता लिएर पनि घर निर्माण नगर्ने भुकम्पपीडितलाई कालोसूचीमा राखी कारबाही गर्ने भएको छ । भुकम्पपीडित लाभग्राही सूचीमा रहेका अधिकांशले राज्यले दिएको अनुदान रकम पहिलो किस्ताको ५० हजार लिए पनि आवास निर्माणमा भने २७ हजारको सूची निर्माणधिन अवस्थामा रहेको तथ्याङ्क पुनर्निर्माण प्राधिकरणसँग छ । राष्ट्रिय पुनर्निर्माण प्राधिकरणको कार्यकारी समितिको ४२औं बैठकले घर निर्माण नगर्नेलाई कालोसूचीमा राखी कारबाही गर्ने निर्णय गरेको हो ।

प्राधिकरणका सह–प्रवक्ता भीष्मकुमार भूसालले भने रकम लिने र घर बनाउने सुरसार नै नगरेकाले उनीहरुलाई दण्डात्मक व्यवस्था गर्न लागेका हौं । कारबाही गर्नुअघि पहिले गोरखापत्रमा सूचना निकालेर भुकम्पपीडित लाभग्राहीहरुलाई सचेत गराइने उनले बताए । पछि कानुनअनुसार रकम फिर्ता गर्नेदेखि कालोसूचीमा राख्नेसम्मको कारबाही हुनेछ । कालोसूचीमा परेकाले सरकारले उपलब्ध गराउने नागरिकता, पासपोर्ट लगायतका कागजात नपाउनुका साथै अन्य नागरिक अधिकारबाट समेत बञ्चित हुने र बैंकको कालोसूचीमा पर्ने उनले बताए ।