बनेपा १६ फागुन । प्रदेशसभा ३ को आज विस्तारित मन्त्री परिषदमा सिन्धुपाल्चोकका सांसद अरुण नेपालले साँझ ५ बजे मन्त्रीको सपथ लिएका छन् । उनले उद्योग, पर्यटन वन तथा वातावरण मन्त्रीको सपथ लिएका हुन् । ३ नम्बर प्रदेश अस्थायी राजधानी मकवानपुरको हेटौंडामा उनी सहित सिन्धुपाल्चोककै अर्का सांसद माओवादीको तर्फबाट सरद दुलालले पनि मन्त्रीको सपथ खाएका छन् । उनले सामाजिक विकास मन्त्रालयको जिम्मेवारी पाएका छन् । दुलाल विगतमा प्रचण्डका बडी गाड थिए । मकवानपुरकै कुमारी मोक्तानलाई पछि पार्दै दुलाल मन्त्री बनेका हुन् ।
सामरिक महत्वको प्रदेशनम्बर ३ ले एकजना पनि महिलालाई मन्त्रीको स्थान दिएन । रामेछापका एमाले सांसद कैलाश ढुंगेल पनि आर्थिक मामिला तथा योजना मन्त्री बनेका छन् । आजै सपथ खाएका ढुंगेल रामेछाप पकरबासका हुन् । त्यसैगरी एमालेकै चितवनका सांसद दावा दोर्जे लामाले कृषि तथा सहकारी मन्त्रीको सपथ लिएका छन् । यसअघि प्रदेश ३ का मुख्य मन्त्री डोरमणि पौडेलले माओवादी केन्द्रका सांसद शालिकराम जम्मरकट्टेल र एमालेका केशव स्थापितलाई मन्त्रीमा नियुक्त गरिसकेका थिए । यससँगै प्रदेश नम्बर ३ को मन्त्रीमण्डल विस्तारले पूर्णता पाएको छ ।