जिल्लाको खोपासीमा केन्द्रिय कार्यालय रहेको बिन्धवासिनी बचत तथा ऋण सहकारी संस्थाले २५ वर्षमा १ अर्ब भन्दा बढी रकम बचत गरेको छ ।

सहकारीले २५ वर्ष पूरा गरेको अवसरमा आइतबार बनेपामा आयोजना गरेको रजत जयन्ती महोत्सवमा दिएको जानकारी अनुसार सहकारीले १ अर्ब ४८ करोड ५७ लाख १९ हजार बचत गरेको हो । त्यस्तै २५ वर्षको अवधिमा २ अर्ब १ करोड ६३ लाख बराबरको आर्थिक कारोबार गरेको छ । १२२ जना शेयर सदस्यबाट सुरु भएको सहकारीमा अहिले २६ हजार ८१८ जना सदस्या रहेका छन् ।

यसमा महिला १८ हजार ४२ र पुरुष ८ हजार ७४५ रहेका संस्थाका अध्यक्ष प्रदिप थापाले जानकारी दिए । त्यस्तै शैक्षिक बाल बचत कर्ता तर्फ ६ हजार २४२ जना गरी जम्मा ३३ हजार ६० जना कुल सेवाग्रही रहेका छन् । ५० जना कर्मचारी रहेको सहकारीले विभिन्न २१ प्रकारका ऋण र १७ प्रकारको शीर्षकमा बचत गर्दै आइरहेको छ । जिल्लाको १३ स्थानीय तह मध्ये ६ नगरपालिका र १ गाउँपालिकामा आफ्नो सेवा विस्तार भएको सहकारीका प्रमूख ब्यवस्थापक के.वी लामाले जानकारी दिए ।

रजत जयन्ती महोत्सवमा बोल्दै राष्ट्रिय सहकारी बोर्डका सहअध्यक्ष दक्ष पौडेलले सहकारीले ग्रामीण भेगमा रहेको पूजीलाई एकीकृत गरी जनताको जीवनस्तर उकास्न मद्दत गर्नुपर्नेमा जोड दिए । “सहकारीहरु सदस्य केन्द्रित हुनुपर्छ, उनले भने “स्थानीय स्तरमा रहेका पूजीलाई एकीकृत गर्ने मात्रै होइन्, नागरिकलाई बचत गर्ने बानीको विकास र आफुलाई आवश्यक परेको बेला सहयोगी बन्नुपर्छ ।”

बैंक नपुगेका ठाउँमा समेत सहकारी पुगेर आम नागरिकलाई बचत गर्ने बानी सिकाइरहेको भन्दै उनले सदस्यको मन जीतेर बदलिदो संचना अनुसार काम गर्न जरुरी रहेको बताए ।