बनेपा/नेपाल राट्रिय शिक्षक संगठन काभ्रेको जिल्ला अध्यक्षमा श्याम प्रसाद पाण्डेय निर्विरोध निर्वाचित भएका छन् । १२ औँ जिल्ला अधिवेशनबाट पाण्डेय अध्यक्षमा दोस्रो पटक निर्विारोध निर्वाचित भएका हुन् ।

संगठनको उपाध्यक्षमा सुवद्रा अधिकारी र चेत प्रसाद शर्मा निर्विरोध निर्वाचित भएका छन् । त्यसैगरी सचिवमा रामचन्द्र थापा, कोषाध्यक्षमा माधव प्रसाद दाहाल, सहसचिवमा युरोपिया श्रेष्ठ, सहकोषाध्यक्षमा सुनिता नेपाल निर्वारोध निर्वाचित भएका हुन् । अधिवेशनले राष्ट्रिय महाधिवेशन प्रतिनिधि सदस्य समेत छनोट गरेको छ ।

निर्वाचित भएपछि अध्यक्ष पाण्डेयले स्थानीय तहमा शिक्षक संगठनको नयाँ समिति गठन भइसकेको र अब उनीहरुलाई सक्षम बनाउन आफु लाग्ने बताए । “नयाँ संरचनासँगै हाम्रो पनि भूमिका फेरिएको छ, स्थानीय तहमा नयाँ समिति बनेका छन्, उनले खबरघर अनलाईनसँग भने “स्थानीय तह र प्रदेश समितिसँग समन्वय गर्दै जिल्ला भित्र रहेका शिक्षकहरुको हकहितमा संगठन अझ सशक्त भएर अघि बढ्छ ।”

संगठनले शिक्षकहरुलाई आवश्यक पर्ने तालिम, शिक्षक सेवा आयोगको तयारी कक्षा जस्ता शिक्षकहरुको क्षमता अभिबृद्धि सम्बन्धित विभिन्न कार्यक्रम सञ्चालन गर्दै आइरहेको छ । नवनिर्वाचित अध्यक्ष पाण्डेयले शिक्षकहरुको सदस्य संख्या बढाउन समेत आफु लागि पर्ने बताए । “संगठनमा आबद्ध भएका तर सदस्यता नविकरण नभएका शिक्षक सदस्यहरुको नविकरण गराउने र संगठनलाई सबैको साझा संगठन बनाउन लाग्ने छु ” उनले भने । १२ औँ जिल्ला अधिवेशनमा १७ सय ४२ जना शिक्षकशिक्षिकाले सदस्यता नविकरण गरेका थिए ।