काभ्रे । नेकपा एमालेको प्रदेश नम्बर ३ को संसदीय दलको निर्वाचनले मकवानपुरका सांसद डोरमणि पौडेललाई दलको नेतामा निर्वाचित गरेको छ । प्रदेश नम्बर ३ मा नेकपा एमालेको तर्फबाट अष्टलक्ष्मी शाक्य र राजेन्द्र पाण्डेको चर्चा भए पनि संसदीय दलको निर्वाचनमा भने पौडिेल निर्वाचित भएका छन् । दलको नेताको लागि राजेन्द्र पाण्डेले दावी गर्दै आए पनि उनले उम्मेदवारी भने दिएनन् । यससँगै पौडेललाई प्रदेश नम्बर ३ को मुख्यमन्त्री बन्ने बाटो खुलेको छ ।

संसदीय दलको नेता चुन्न एमालेको शुक्रबार भएको चुनावमा शाक्य र पौडेलले उम्मेदवारी दिएका थिए । दलको चुनावमा ५८ मत खसेकोमा पौडेलले ३४ मत पाए भने पार्टी उपाध्यक्ष समेत रहेकी शाक्यले २४ मत मात्र पाएकी थिइन् । प्रदेश नम्बर ३ मा नेकपा एमालेको ५८ जना सांसद छन् । निर्वाचित भएपछि पौडेलले प्रदेश सरकारले स्थानीय तह र केन्द्र सरकारबीच पुलको रुपमा काम गर्ने बताएका छन् ।