धुलिखेल । जिल्लामा यो वर्ष धान उत्पादनमा सामान्य बृद्धि भएको छ । जिल्ला कृषि विकास कार्यालयका बरिष्ठ कृषि विकास अधिकृत दुर्गा पण्डितका अनुसार अघिल्लो वर्षको तुलनामा यो वर्ष ३ प्रतिशत धान उत्पादन बृद्धि भएको हो । जिल्लाको मण्डनदेउपुर, पाँचखाल, खोपासी, भकुण्डे लगायतका टारहरुमा यो वर्ष धान उत्पादन सन्तोषजनक रहेको कार्यालयले जनाएको छ ।

त्यस्तै जिल्लाको कोशीपारी, डाँडापारी, रोशी भेगमा पनि धान उत्पादनमा राम्रो रहेको बरिष्ठ कृषि विकास अधिकृत पण्डितले बताए । जिल्लाको कुल १० हजार १ सय हेक्टर क्षेत्रफल जमिनमा बर्खे धानखेती हुने गरेको छ । त्यस्तै १ हजार २१० हेक्टर क्षेत्रफल जमिनमा चैते धान खेती हुदै आएको छ । जिल्लामा बार्षिक प्रति हेक्टर ३.५ मेक्ट्रिटन धान उत्पादन हुदैँ आएको छ ।