पूर्वगृहमन्त्री समेत रहेका सशक्त नेता गोविन्दराज जोशीले नै बागीमा उम्मेदवारी दिएपछि तनावमा परेका कांग्रेस वरिष्ठ नेता रामचन्द्र पौडेललाई केही राहत मिलेको छ । जोशीको उम्मेदवारी रद्द गर्ने निर्वाचन आयोगको निर्णयसँगै पौडेललाई राहत मिलेको हो ।

नेपाली कांग्रेसले टिकट नदिएपछि पूर्वगृहमन्त्रीसमेत रहेका जोशीले तनहुँ एकबाट प्रतिनिधिसभा सदस्यका लागि स्वतन्त्रमा उम्मेदवारी दर्ता गराएका थिए ।  कांग्रेसका वरिष्ठ नेता एवं तनहुँ एकका उम्मेदवार पौडेलले उजुरी दर्ता गराएपछि भ्रष्टाचारको मुद्दामा दोषी ठहर गर्दै निर्वाचन आयोगले जोशीको उम्मेदवारी रद्द गर्ने निर्णय गरेको हो । आयोगले नैतिक पतन देखिने उम्मेदवार अयोग्य हुने कानुनी व्यवस्था भएको भन्दै जोशीको उम्मेदवारी बदर गरेको जनाएको छ ।

वामगठन्धनकै कारण तर्सिएका पौडेल सशक्त नेताले नै भागी उम्मेदवारी दिएपछि थप तनावमा परेका थिए ।  तनहुँ–१ मा बाम गठनबन्धनबाट एमालेका कृष्णकुमार श्रेष्ठले उम्मेदवारी दिएका छन् । २०७० सालको निर्वाचनमा श्रेष्ठ तनहुँ २ बाट वरिष्ठ नेता पौडेलसँग पराजित भएका थिए । स्थानीय तहमा पाएको मतलाई आधार मान्दा बाम गठनबन्धनबाट साझा उम्मेदवारी दिएका श्रेष्ठ पनि सशक्त मानिन्छन् । जिल्लामा कांग्रेसको भन्दा वाम गठबन्धनको मत केही बढी रहेको छ ।