काठमाण्डौ/नेत्रविक्रम चन्द विप्लव नेतृत्वको नेकपा माओवादीले भोली मंसिर ८ गतेको बन्द हल्ला मात्रै भएको बताएको छ । माओवादीका पोलिटब्युरो सदस्य तथा जनवर्गीय संगठन इन्चार्ज मोहन कार्की जिवन्तले आफ्नो फेसबुक स्टाटस मार्फत आफुहरुले बन्दको आयोजना नगरेको बताएका हुन् ।

मंसिर १० र २१ म हुने प्रतिनिधिसभा र प्रदेशसभा सदस्य निर्वाचनको बहिष्कारमा रहेको माओवादीले मंसिर ८ गते नेपाल बन्द आह्वान गरेको हल्ला थियो । नेता कार्कीले आफ्नो स्टाटसमा लेखेका छन् “मंसिर ८ गतेको नेपाल बन्द नेकपा माओवादी सम्बद्ध कुनै पनि भ्रातृ संघसंगठन र जनमुक्ति सेनाले आयोजना गरेका छैनन्, बन्दको भ्रममा नपर्न सबैलाई आग्रह गर्दछु ।”

उनले अहिले देशब्यापी रुपमा भइरहेको बम काण्ड पनि आफ्नो पार्टीको नीतिभित्र नरहेको बताउँदै त्यसमा मुछेर आफ्ना नेता कार्यकर्ता पक्राउ गर्नु षड्यन्त्रपूर्ण रहेको बताए ।